Redjan Hadëri, 33-vjeç, banues në Tepelenë, është vënë në pranga pasi akuzohet për plagosjen e pronarit të “Orange Club” në Sarandë, Spiro Iljadhi.
U qëllua me 20 plumba
Spiro Iljadhi, 35-vjeç, i njohur edhe me emrin Ermal Iljazi, ndërsa shkurt njihej me emrin “Ero”, ka mbetur i plagosur rëndë pas të shtënave me armë zjarri. Plumbat kapën edhe një kalimtar të rastit, i identifikuar si Mario Jani, 33-vjeç, shqiptaro-amerikan.
Pronari i lokalit të njohur në Sarandë, “Orange Club” është qëlluar me 20 plumba në orët e para të mëngjesit të së dielës. Policia arriti të identifikojë autorët e ngjarjes, dy prej të cilëve vëllezër. Ata janë shtetasit Andrea Caushi, 35-vjeç, vëllai i tij, Visi Caushi, 33 vjeç, ndërsa në pranga ka rënë shtetasi Redjan Hadëri.
Tre autorët e dyshuar kanë qëlluar me breshëri në drejtim të biznesmenit Spiro Iljadhi, ndërsa në vendin e gabuar ka qenë edhe Mario Jani, për të cilin policia thotë se banon në Tiranë, ndërsa kishte shkuar në Sarandë për të kaluar disa ditë pushimi.
“Këta shtetas, rreth orës 03:50, në lagjen Nr.1, Sarandë, në afërsi të një lokali, në bashkëpunim me njëri-tjetrin, dyshohet se kanë plagosur me armë zjarri shtetasin S. I., 35 vjeç, banues në Sarandë dhe një kalimtar të rastit, shtetasin M. J., 33-vjeç, banues në Tiranë, të cilët ndodhen në spital, jashtë rrezikut për jetën”, sqaron policia lokale.
Biznesmeni i plagosur, nuk njihet si person problematik
Biznesmeni i plagosur me armë zjarri në orët e para të mëngjesit të djeshëm nuk njihet si person problematik në zonë, ndërsa nuk ka precedentë të mëparshëm penalë. Lokali ndodhet në rrugën Turizëm-Kanali Cukës në qytetin bregdetar. Pasi qëlluan me armë automatike në drejtim të 35- vjeçarit, dy vëllezërit dhe shoku i tyre u larguan me shpejtësi nga vendi i ngjarjes, duke arritur t’u shpëtojnë prangave të policisë. Forcat e rendit ngritën pika kontrolli në zonë.
Motivet e ngjarjes
Tashmë janë zbardhur motivet e ngjarjes së ndodhur në orët e para të mëngjesit të djeshëm në Sarandë, ku u qëllua me 20 plumba në drejtim të pronarit të “Orange”, Spiro Iljadhi 35-vjeç, afër lokalit të tij, ku rastësisht u plagos edhe pushuesi Mario Jani, 33-vjeç.
Gjithçka ka nisur kur 3 autorët Andrea Caushi, Visi Caushi (vëllezër) dhe shoku i tyre Redjan Hadëri janë nxjerrë jashtë lokalit “Orange” nga roja i sigurisë së lokalit.
Ata janë kthyer me armë, duke shtënë drejt lokalit dhe automjetit “Range Rover” të pronarit Spiro Iljadhit. Pasi ka dëgjuar krismat e armëve, Iljadhi ka dalë jashtë dhe ende nuk dihet me saktësi nëse e kanë zënë plumbat teksa po shkrepeshin drejt lokalit apo nëse autorët kanë qëlluar me qëllim në drejtim të 35-vjeçarit.
