Një 33-vjeçar ka rënë në prangat e policisë në Fier, pasi u kap me dy mina me telekomandë në makinë, me qëllimin për t’i shitur. Policia ka përcjellë të dhënat në lidhje me prangosjen e shtetasit Elton Jata, banues në Pezë, të cilit në mjetin tip “Benz” me të cilin po udhëtonte, iu gjetën 2 elektrodetonatorë të montuar në brendësi të lëndës plasëse të lidhur me celularë, të gatshme për shpërthim të kontrolluar.
Në sajë të operacionit të koduar “Porosia”, u bë e mundur kapja e 33-vjeçarit të rrezikshëm, banues në Pezë, Tiranë. Nga ana e policisë, vijon operacioni për identifikimin e personave të tjerë, të përfshirë në këtë veprimtari kriminale. Lidhur me këtë rast, materialet do i kalojnë Prokurorisë pranë Gjykatës së Shkallës së Parë Fier, për veprën penale “Trafikimi i lëndëve plasëse, djegëse, helmuese dhe radioaktive”.
Njoftimi
Fier
Finalizohet operacioni policor i koduar “Porosia”. Goditet një rast i trafikimit të minave me telekomandë. Sekuestrohen në cilësinë e provës materiale 2 mina me telekomandë, arrestohet në flagrancë poseduesi i tyre.
Në vijim të punës për parandalimin dhe goditjen e rasteve të trafikimit të armëve të zjarrit e lëndëve plasëse, bazuar dhe në informacionet e marra në rrugë policore, specialistët e Seksionit për Hetimin e Narkotikëve dhe Trafiqeve të Paligjshme në DVP Fier, në bashkëpunim me forcën e posaçme “Shqiponjat”, finalizuan me sukses operacion policor të koduar “Porosia”, si rezultat i të cilit u bë e mundur kapja dhe arrestimi në flagrancë i shtetasit E. J., 33 vjeç, banues në Pezë, Tiranë.
Nga kontrolli i ushtruar nga shërbimet policore, në vendin e quajtur “Vija e Ngjalës”, në mjetin tip “Benz” me të cilin ky shtetas udhëtonte, iu gjetën 2 elektrodetonatorë të montuar në brendësi të lëndës plasëse të lidhur me celularë, të gatshme për shpërthim të kontrolluar, të cilat u sekuestruan në cilësinë e provës materiale.
Vijon operacioni për identifikimin e personave të tjerë të përfshirë në këtë veprimtari kriminale.
Materialet do i kalojnë Prokurorisë pranë Gjykatës së Shkallës së Parë Fier, për veprën penale “Trafikimi i lëndëve plasëse, djegëse, helmuese dhe radioaktive”.
