Policia, në një aksion për drogën në Fushë-Krujë ka vënë në pranga shtetasin me inicialet P.K., pasi në oborrin e banesës janë gjetur disa fidanë të dyshuar cannabis sativa. Sakaq, në fshatin Brret, Krujë, në një zonë të pyllëzuar janë gjetur të kultivuar fidanë cannabis sativa. Po të njëjtat burime zyrtare shtojnë se nga kontrolli në territor, në një fuçi metalike janë gjetur të fshehura dy armë zjarri. Bëhet fjalë për 1 automatik dhe 1 pushkë. Në bashkëpunim me Prokurorinë, vijon puna për identifikimin dhe kapjen e personave që kanë fshehur armët, dhe të autorëve të kultivimit të fidanëve narkotikë.
Njoftimi i policisë:
Vijojnë kontrollet për parandalimin, evidentimin dhe goditjen e tentativës për kultivim të bimëve narkotike. Kontrollet po zhvillohen në territor, në sipërfaqe të pyllëzuara, banesa të braktisura nga pronarët, ish-reparte ushtarake dhe në ato banesa për të cilat disponohet informacion policor se mund të ketë tendencë për kultivim të bimëve narkotike apo armëmbajtje pa leje.
Si rezultat i kontrolleve është vënë në pranga shtetasi P. K., banues në Fushë Krujë, pasi gjatë kontrollit në oborrin e banesës së tij, shërbimet e Policisë kanë gjetur disa fidanë të dyshuar cannabis sativa, të cilët u sekuestruan në cilësinë e provës materiale.
Po si rezultat i kontrolleve në territor, në fshatin Brret, Krujë, në një zonë të pyllëzuar, janë gjetur të kultivuar fidanë cannabis sativa.
Gjithashtu, nga kontrolli në territor, në një fuçi metalike janë gjetur të fshehura dy armë zjarri, konkretisht 1 automatik dhe 1 pushkë. Në bashkëpunim me Prokurorinë vijon puna për identifikimin dhe kapjen e personave që kanë fshehur armët dhe të autorëve të kultivimit të fidanëve narkotikë.
Shërbimet policore po vijojnë pa ndërprerë kontrollin e territorit dhe të vendeve të dyshuara, me qëllim kapjen e personave që ushtrojnë veprimtari kriminale në fushën e kultivimit dhe trafikimit të bimëve narkotike ose armëmbajtjes pa leje.
