Ka rinisur nga sot pas një pushimi të zgjatur prej pandemisë procesi i kolaudimit të automjeteve në vend. Qytetarët kanë pasur në vijimësi pyetje të shumta në raport me kontrollin e mjetit të tyre.
Ja disa përgjigje për pyetjet më të shpeshta:
Për të shmangur radhët në subjektet e kontrollit teknik janë përcaktuar një kategori automjetesh që e kanë emergjencë futjen në lupën e kontrollit teknik. Bëhet fjalë për mjetet që u kthyen mbrapsht vitin që shkoi, ato që hynë në Shqipëri gjatë kohës që kolaudimi nuk funksiononte si shërbim, si dhe një sërë mjetesh në funksion komunitar.
“Shërbimi do të nisë së pari me mjetet që janë refuzuar në kolaudim vjet, pra ata pa certifikata të vlefshme dhe që s’kanë përfituar as shtyrje afati, as zgjatje afati. Pastaj kemi mjetet me kilometra të regjistruara pas datës 31 dhjetor 2020 që do t’i nënshtrohen kolaudimit për herë të parë. Përveç tyre janë dhe mjetet taksi, autoshkolla, ato që shërbejnë për transport udhëtarësh e ambulanca që u është bërë 12-mujorshi, 6+6. Pra, kanë kapur afatet e normave të reja të ndryshuara. E kështu gradualisht do të ecim”, sqaron Blendi Gonxhe. Kategoritë e automjeteve të përmendura nga Gonxhe përllogariten të jenë diku rreth 150 mijë të tilla.
Gonxhe bëri me dije se çdo certifikatë e skaduar, favorizohet me plus dymbëdhjetë muaj.
Ndër të tjera, Gonxhe tha se prenotimet do të kryhen online, dhe se ky lloj shërbimi do të jetë më cilësor për qytetarët.
Blendi Gonxhe: “Ne i kemi marrë të gjitha masat që çfarëdo lloj skenari të mos prekë këtë skaletë. Ky është i vetmi rast që nuk do ketë vend për politikë, interesi është shumë i lartë, flitet sigurinë rrugore, për 1 mln drejtues. Kemi skaletën tonë, nuk e diskutojmë që do hapemi më 31 maj. I keni paguar 1800 lekë për kolaudimin në një kontroll, do paguani 1800 lekë për kolaudimin për dy vjet, domethënë është përgjysmuar, mendoni dhe koston për ardhjen, kohën. Ajo që kërkojmë në këmbim është përgjegjësi më e lartë nga drejtuesit”.
“Do jenë më cilësore. Një modul i tërë i punuar, ndërtuar. Për mendimin tonë duhet të ishte në databazën zyrtare. Sistemi i rezervimit bën që planifikimi të jetë i juaji, personal dhe është e pamundur të shisni radhën. Do jenë online në e-albania, mund të vihet dhe fizikisht në zyrat tona duke pritur oraret. Drejtoritë tona të licencimit dhe transportit po merren me organizimin e subjekteve, taksitë, mjetet e flotave publike që do jenë në lentën e zmadhimit të kontrollit teknik këtej e tutje. Do duhet të investojmë për modernizimin për mjete të mira dhe të pastra se pa investime nuk ka retorikë të gjelbër”
Për mjetet e reja
“Për mjetet e reja nuk do të ketë kolaudim tre vitet e para sepse e konsiderojmë tëtepërt. Janë mjete në gjendje perfekte, nuk ka çfarë të kolaudojmë në këto mjete, ato kontrollohen në kontroll fizik kur marrin targat ditën e parë dhe pastaj aty bëhet i gjithë kontrolli i plotë i automjetit. Koncesionari ose shitësi i makinës me 0 km është garanti me një faturë që e ka shitur këtë makinë apo makinë e zhdoganuar sërisht me një faturë, që kjo makinë me 0 km mund të dalë në rrugë”, tha Gonxhe./ Tirana Today
