Lëvizja Socialiste për Integrim, nuk ka mundur të fitojë mandatin e deputetit për qarkun e Durrësit, pas përfundimit të rinumërimit nga KAS, të 108 kutive për këtë qark.
Nga rihapja e kutive, Partia Socialiste ka humbur 26 vota, Partia Demokratike 38 ndërsa Lëvizja Socialiste për Integrim, ka humbur vetëm një votë.
Megjithatë, ky rezultat nuk e favorizoi LSI-në, e cila pretendonte mandatin, dhe diferenca me PS-në, ishte 126 vota.
Ndërkohë, Komisioni i Ankesave dhe Sanksioneve pritet që të mblidhet sërish në orën 19:30 për të dhënë verdiktin përfundimtar.
“Mbyllet numërimi i 108 kutieve të kërkuara. Do të duhet një afat i shkurtër për të bërë një çek, e ndërpresim seancën për t’u mbledhur në orën 19:30,”-tha relatori i seancës së sotme, Elvin Lako.
Më herët, PD dhe LSI kërkuan ripërsëritjen e zgjedhjeve në Qarkun e Durrësit, pasi sipas tyre ka pasur disa parregullsi e është deformuar vullneti i qytetarëve.
Por kjo kërkesë u hodh poshtë nga KAS, e cila la në fuqi, vendimin e Komisionerit Shtetëror të Zgjedhjeve, i cili i cilësoi zgjedhjet në këtë qark si të rregullta e të vlefshme.
