India po përballet me epideminë e“kërpudhave të zeza”, teksa rastet e infeksionit të rralë por që mund të jetë edhe fatal, kanë shpërthyer tek pacientët që po shërohen nga COVID-19.
Sëmundja e kërpudhave, e quajtur mukormikozë, ka një normë vdekshmërie prej 50 për qind, shkruan The Guardian.
Kjo sëmundje prek pacientët fillimisht në hundë, por pastaj mund të përhapet në tru dhe shpesh mund të kurohet vetëm me operacion të madh duke hequr syrin ose pjesën e kafkës dhe nofullës.
Zakonisht është një sëmundje e rrallë, por në Indi deri më tani janë raportuar më shumë se 7,200 raste me mukormikozë teksa janë raportuar 219 persona viktima.
Rritja e infeksioneve të “kërpudhave të zeza”, kryesisht tek pacientët që kishin raste të rënda të COVID-19, ka qenë e lidhur me një përdorim të tepërt të steroideve në trajtimin e koronavirusit, që mund të rrezikojë në mënyrë akute sistemin imunitar nëse merret për një periudhë të zgjatur.
