Një aktor ka mbetur i lënduar gjatë një shfaqje në Shkodër, pasi gjatë interpretimit ka rënë suvaja e ndërtesës historike. Ngjarja ka ndodhur dje, ndërsa ka pësuar dëmtime në shpinë aktori Nikolin Ferketa.
Ai po interpretonte në shfaqjen “Mramje Koliqiane” në zonën muzeale të Shkodrës, ku dhe ka rënë suvaja e ndërtesës së vjetër. Trupa e Teatrit Migjeni ka nisur një tur të shfaqjes “Mramje Koliqiane” me vepra të të madhit Ernest Koliqi.
Bëhet me dije po kështu se shfaqja në Shkodër është mbajtur në lagjen historike të qytetit, ku për shkak të situatës me COVID-19, aktorët nuk mund të luajnë brenda Teatrit.
Drejtoresha e Teatrit Migjeni, Rita Gjeka, ka kërkuar nga ana e institucioneve që të merren masat e menjëhershme, dhe që raste të tilla të mos përsëriten më.
