Komisioni i Ankimimeve dhe Sanksioneve (KAS) pranë KQZ-së bën një hap drejt pranimit të kërkesës së opozitës për zgjedhjet e 25 prillit. KAS vendosi sot hapjen e 24 kutive votimi në qarkun e Beratit, ndërkohë që ka rrëzuar kërkesën e Partisë Demokratike për paraqitjen e provave të reja.
Komisioni i Ankesave dhe Sanksioneve u mblodh sot në orën 10:00 për të dhënë vendimin pas shqyrtimit të ankesave për qarkun e Beratit. Vetë KAS në një njoftim me një video të shkurtër bëri me dije një ditë më parë se, dhënien e vendimit e shtyu për sot, pasi po merrte në konsideratë mundësinë e pranimit të disa provave shtesë dhe se do t’ju duhej kohë për t’i verifikuar.
Mbledhja për Beratin
Gjatë mbledhjes së zhvilluar të premten pati debate mes përfaqësuesve të subjekteve të opozitës, Partia Demokratike, Lëvizja Socialiste me anëtarëve të KAS-it. Mbledhja nisi me paraqitjen e dokumenteve shtesë që opozita i quan prova në lidhje shkeljet dhe pretendimet për këtë qark. Përfaqësuesi i opozitës, Altin Kaziaj, si përfaqësuesi i LSI-së, kërkoi që në fillim rinumërim të votave. Sipas tij, në Berat, në një prej qendrave të votimit, ka një mospërputhje të numrit të votuesve me fletët e votimit dhe ata që janë regjistruar në pajisjen e identifikimit (PEI). Ndërkohë që ky fakt u kundërshtua nga juristi i Partisë Socialiste, Eridian Salianji, i cili tha se janë bërë hetime dhe se të gjithë komisionerët janë dakordësuar për problematikat e mundshme.
Përpalsja Logu-Rusmali
Përfaqësuesi i PD-së në mbledhjen e djeshme në KAS, Marash Logu, debatoi ashpër me anëtarin Ilir Rusmali, teksa ky i fundit kërkoi argumentim të kërkesave të opozitës. Logu i kërkoi anëtarëve të KAS-it që të merreshin provat nga Prokuroria. “Cila është arsyeja që refuzoni të merrni prova nga SPAK?”, pyeti Logu Rusmalin, duke i kujtuar se, Komisioni Qendror i Zgjedhjeve është institucioni përgjegjës për organizimin dhe administrimin e zgjedhjeve dhe referendumeve, i cili drejton dhe mbikëqyr veprimtarinë e administratës zgjedhore, monitoron veprimtarinë e subjekteve zgjedhore, organeve dhe institucioneve shtetërore dhe të medias në raport me zgjedhjet, si dhe zgjidh në rrugë administrative kërkesat apo ankesat që kanë lidhje me procesin zgjedhor.
Përfaqësuesi i PD-së deklaroi gjithashtu se kandidatët e PS-së në Berat, veçanërisht Hatixhe Konomi dhe Nasip Naço, kanë ngritur një skemë kriminale të blerjes së votës me 50 mijë lekë për person. Ndërsa përfaqësuesi i Partisë Socialiste Eridian Salianji nuk i konsideroi si prova të vlefshme provat që paraqiti Logu në KAS.
Ankimimet
Opozita ka ankimuar rezultatin e zgjedhjeve, duke kërkuar përsëritjen e zgjehdjeve në 9 qarqe nga PD dhe 5 nga LSI. Partia Demokratike kërkon rivotim, ndërsa LSI kërkon edhe rinumërim edhe rivlerësim të votave. Ndërkaq, KAS i rrësoi kërkesat e opozitës për Gjirokastrën, duke i cilësuar si të pavlefshme. “Provat janë të bazuara në shpifje dhe jo në prova”, tha përfaqësuesi i PS-së në KAS, Salianji./ Tirana Today
