Sekretari per Çeshtjet Zgjedhore në Partinë Demokratike Ivi Kaso e cilësoitë paligjshëm vendimin e Komisionit të Ankesave dhe Sanksioneve (KAS) për të rrëzuar kërkesën e PD-së për paraqitjen e provave të reja në lidhje me zgjedhjet e 25 prillit.
Në një deklaratë për mediat, Kaso u shpreh se KAS ka detyrimin të administrojë çdo që gjë që palët garuese në proces zgjedhor dhe ankimuese, nuk kanë patur mundësi ta sigurojnë dot vetë.
Sipas tij, gjithçka që ka pretenduar, Partia Demokratike e ka të provuar dhe provat i janë dërguar KAS-it, teksa shtoi se do t’i dërgojë kërkesat ankimore edhe në shkallët e tjera.
Ivi Kaso: “PD i është drejtuar institucioneve për t’i kërkuar këto prova, por provat nuk janë vënë në dispozicion dhe nuk besoj se do i vihen ndonjëherë në dispozicion opozitës. Detyrimi është i qartë që provat tu vihen në dispozicion procesit ankimor dhe sa kohë këto prova nuk disponohen, procesi nuk mund të jetë i plotë, i qartë dhe çdo mosmarrëveshje zgjedhore nuk mund të zgjidhet në mënyrë të drejtë. KQZ ka detyrimin të administrojë çdo që gjë që palët garuese në proces zgjedhor dhe ankimuese, nuk kanë patur mundësi ta sigurojnë dot vetë.
PD gjithçka që ka pretenduar e ka të provuar dhe provat i ka të depozituara në KAS, një pjesë e të cilave janë bërë publike. Ne kemi pretenduar që dimensioni i plotë i gjithçkaje që ka ndodhur do të publikohet dhe do të vijë në vëmendjen e publikut në tryezën e KQZ vetëm pasi të administrohet i gjithë dokumentacioni që ata refuzojnë që ta ndajnë me PD, mediat dhe aktorë të tretë. Pritshmëria jonë për KAS është që ata të zbatojnë ligjin”.
Komisioni i Ankimimeve dhe Sanksioneve (KAS) pranë KQZ-së bëri një hap drejt pranimit të kërkesës së opozitës për zgjedhjet e 25 prillit. KAS vendosi sot hapjen e 24 kutive votimi në qarkun e Beratit, ndërkohë që ka rrëzuar kërkesën e Partisë Demokratike për paraqitjen e provave të reja.
