Komisioni i Ankesave dhe Sanksioneve në Komisionin Qendror të Zgjedhjeve ka rrëzuar kërkesat e Lëvizjes Socialiste për Integrim, koalicionit Partia Demokratike-Aleanca për Ndryshim dhe të deputetit të pavarur Kreshnik Merxhani për qarkun e Gjirokastrës.
Ndërkohë, KAS deklaroi në mbledhjen e sotme se të gjitha provat që janë dërguar nga palët përkatëse do të shqyrtohen.
Përsa u përket emrave që LSI-ja ka pretenduar se kanë qenë komisionerë, KAS tha se do të kërkojë vënien në dispozicion të pamjeve filmike të KZAZ-ve përkatëse.
”Shqyrtimin e kërkesave ankimore, të subjekteve zgjedhore të LSI, koalicioni PD dhe Aleanca për Ndryshim dhe kandidati Kreshnik Merxhani. KAS u tërhoq në dhomë këshillimin në lidhje me provat e palëve, po ashtu edhe për ankesat ankimore e provat. Provat që palët kanë sjellë do të pranohet për shqyrtim, kërkesat që palët bënë, u vendos rrëzimi i kërkesës së LSI, në lidhje me provat që kërkon të merret. Sa i përket emrave që kanë qenë komisioner, dy anëtarë të KAS-it, i kërkojmë KQZ, që të na vërë në dispozicion sa më shpejt të jetë e mundur që personat në lista kanë qenë pjesë e administratës zgjedhore, nga dita e zgjedhjeve e deri në shpalljen e rezultateve.
Kërkesa e fundit me këqyrjen dhe me kryqëzimin e të dhënave nga pajisja identifikuese në Qarkun e Gjirokastrës, kërkojmë që brenda afatit sa më shpejt, të na vihet në dispozicion informacioni në lidhje me pajisjet identifikuese në Qarkun e Gjirokastrës. Në lidhje me kërkesat për prova të subjektit zgjedhor të kandidatit Kreshnik Merxhani, u vendos me shumicë votash rrëzimi i kërkesës.”, bëri të ditur KAS.
KAS u mblodh sot zyrtarisht për të shqyrtuar ankesat e disa partive, përfshirë Partinë Demokratike dhe Lëvizjen Socialiste për Integrim, për 9 qarqe. PD-AN dhe LSI kërkojnë rishikim të rezultatit në 9 qarqe.
KAS shqyrtoi sot kërkesat që kishin në fokus ankesat e opozitës për qarkun e Gjirokastrës, ndërsa për qarkun e Beratit do të shqyrtohen më 14 maj.
