Kryedemokrati Lulzim Basha ka mbledhur me urgjencë në selinë blu, sekretarët dhe kryetarët e degëve të Partisë Demokratike. Mësohet se në fokusin e mbledhjes është analiza e zgjedhjeve parlamentare të 25 prillit.
Në takim, pritet që të diksutohet edhe mbi zërat kritikë ndaj kreu të PD-së, të cilët kanë kërkuar edhe dorëheqjen e Lulzim Bashës pas humbjes në zgjedhje.
Ndërkohë, ditën e sotme Basha ka reaguar për herë të parë ndaj kritikëve dhe atyre që duan largimin e tij nga posti i kryetarit.
Teksa u pyet nga gazetarët në mesditë pas daljes së tij nga selia, Basha është përgjigjur duke thënë se do të ketë një dalje për mediat dhe se beteja do të vazhdojë deri në fitore.
“Do kemi një dalje të plotë për mediat me të gjitha. Kur të vijë momenti i duhur.”, tha Basha. Me këtë deklaratë, Basha tregon se nuk ka ndërmend të dorëhiqet nga kreu i PD.
Zgjedhjet parlamentare të 25 prillit u fituan nga Partia Socialiste, e cila siguroi 74 mandate dhe do të qeverisë sërish e vetme për 4 vitet që vijnë.
Por, opozita deklaroi se këto zgjedhje ishin të manipuluara, pasi sipas saj u përdorën presione te administrata zgjedhore, si dhe pati shitblerje të votës.
