Sokol Novaku, shefi i krimeve në Komisaritin e Policisë së Gramshit është kërcënuar me jetë për shkak të detyrës së tij. Tashmë familja e tij është larguar nga qyteti i Gramshit dhe është marrë në mbrojtje nga policia.
Mësohet se persona të paidentifikuar e kanë kërcënuar se do ta djegin të gjallë, e do ta bëjnë ushqim për derra, bashkë me familjen.
Vetëm dy ditë më parë, Novaku ka depozituar në Prokurorinë e Rrethit Elbasan kallëzim për kërcënimin e marrë.
Lidhur me kërcënimet e marra, në Drejtorinë Vendore të Policisë së Elbasanit, në bashkëpunim me Prokurorinë e rrethit, është ngritur një grup i posaçëm hetimor.
Novaku ka mbajtur detyrën e shefit të sektorit të lëndëve narkotike në Elbasan, ndërsa më herët ka qenë edhe shef i komisariatit Nr.2 në Tiranë.
