Në Argjentinë është zbuluar një dokument i cili ngre edhe më shumë pyetje në lidhje me vdekjen e Diego Maradonës.
Ikona e futbollit botëror, ndërroi jetë pas një sulmi në zemër në moshën 60-vjeçare në Buenos Aires, më 25 nëntor të vitit 2020. Në fillim të atij muaji, më 2 nëntor, Maradona ishte shtruar në spitalin e La Platas dhe kreu një operacion në tru.
Sot është publikuar një dokument i klinikës Olivos për gjendjen e Maradonës, dhe përmban detaje të një takimi të 5 nëntorit mes vajzave të legjendës argjentinase, doktorit të tij Leopoldo Luque, psikiatrit të tij Dra Cosachov, drejtorit të klinikës Pablo Dimitroff dhe kujdestarit të kujdesit intensiv Fernando Villarejo.
Ky dokument, i cili tregon me hollësi gjendjen shëndetësore të Maradonës, është i rëndësishëm për hetimet që janë duke vazhduar për zbardhjen e shkaktarit kryesor të vdekjes së tij, shkruan media argjentinase, Infobae.
“Kjo pjesë e dokumentit tregon shumë qartë sa shumë po rrezikonte Maradona”, ka thënë një hetues.
“Sa për të shpjeguar: klinika u thotë doktorëve të tij personalë se trajtimi mund të jetë i rrezikshëm madje edhe me doza të kontrolluara, me mbikëqyrje, me oksigjen dhe me ndihmë ushqyese. Asnjëra prej këtyre nuk ndodheshin në shtëpinë e tij në Tigre”, shtoi ai.
