Kolegji i Posaçëm i Apelimit (KPA) rrëzon vendimin e Komisionit të Pavarur të Kualifikimit (KPK), për shkarkim nga detyra të prokurorit, Arqile Koça.
Në vendimin e saj, KPA e cilëson shkarkimin të padrejtë, ndaj urdhëron rikthimin e menjëhershëm të Koçës në detyrë pranë Prokurorisë së Përgjithshme.
Trupa gjykuese përbëhej nga Ardian Hajdari kryesues, Sokol Çomo relator, Albana Shtylla, Natasha Mulaj, Rezarta Schuetz, anëtarë.
Koça është subjekti i 3-të që rikthehet në detyrë nga KPA, pasi më parë janë rikthyer Fuat Vjerdha dhe Ervin Goga.
Njoftim vendimi
Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Sokol Çomo relator, Albana Shtylla, Natasha Mulaj, Rezarta Schuetz, anëtarë, shpalli sot vendimin për çështjen (JR) nr. 25/2019, datë 20.05.2019, që i përket ankimit të paraqitur nga subjekti i rivlerësimit Arqilea Koça kundër vendimit nr. 113, datë 08.03.2019, të Komisionit të Pavarur të Kualifikimit.
Në përfundim të gjykimit, bazuar në nenin 59, pika 1 dhe 66, pika 1, shkronja “b” e ligjit nr.84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, trupi gjykues, me shumicë votash, vendosi:
- Ndryshimin e vendimit nr.113, datë 08.03.2019 të Komisionit të Pavarur të Kualifikimit, që i përket subjektit të rivlerësimit Arqilea Koça dhe konfirmimin e tij në detyrën e prokurorit pranë Prokurorisë së Përgjithshme.
- Ky vendim është përfundimtar dhe ka efekt të menjëhershëm
U shpall sot, në Tiranë, më datë 15.12.2020.
