Ministrja e Punëve të Jashtme dhe Diasporës së Kosovës, Meliza Haradinaj-Stublla, u shpreh se shqiptarët që jetojnë në Luginë të Preshevës dhe në Mal të Zi, duhet të gëzojnë të drejta të barabarta sikurse të gjithë qytetarët e tjerë.
Pas takimit që ka zhvilluar me ministrin në detyrë për Evropën dhe Punët e Jashtme të Shqipërisë, Gent Cakaj dhe përfaqësuesit e shqiptarëve të Luginës së Preshevës, Haradinaj-Stublla tha se Kosova dhe Shqipëria si dy shtete demokratike, kanë bashkëpunim të ngushtë në rrugëtimin e përbashkët euroatlantik.
“Si të gjitha komunitetet tjera të respektuara në Kosovë dhe në Serbi, edhe komuniteti shqiptar duhet të gëzojë të drejta në Serbi dhe në Mal të Zi dhe të mos diskriminohet skajshëm siç vazhdon të jetë gjendja sot”, deklaroi ministrja.
Ministri Cakaj, tha se Shqipëria dhe Kosova janë duke marrë përgjegjësi për mirëqenien e shqiptarëve në rajon.
“Shqiptarët e Luginës së Preshevës kanë nevojë për përmirësimin e gjendjes së tyre, por ky është një proces i gjatë. Në arenën ndërkombëtare, ne kemi qenë zë i tyre”, tha ai.
Të dy ministrat folën edhe për procesin e dialogut ndërmjet Kosovës dhe Serbisë, duke ripërsëritur qëndrimin e Kosovës për njohje reciproke.
