Ministrja e Shëndetësisë, Ogerta Manastirliu, udhëzon të gjithë qytetarët që po trajtohen në shtëpi nga koronavirusi, se si të përfitojnë rimbursimin e barnave.
Manastirliu thekson se për të përfituar recetën me rimbursim qytetarët duhet të lidhen me mjekun e familjes, ose nëse nuk kanë kontakt të tij, të lidhen me linjën e gjelbër.
”Qeveria rimburson #BarnatFalas për qytetarët e diagnostikuar me COVID19.
Si të përfitoni recetën me rimbursim? Lidhuni me mjekun tuaj të familjes.
Nëse nuk keni kontaktin e mjekut tuaj të familjes lidhuni me linjë e gjelbër ?0800 40 40 për ta mësuar.”, shkruan Manastirliu në rrjetin social, Facebook.
Ditën e djeshme, qeveria miratoi me anë të një VKM-jë, paketën e rimbursimit të barnave për pacientët me Covid-19.
Vlera e rimbursimit të paketës së barnave për skemën 1 të trajtimit (forma e lehtë) do të jetë jo më shumë se 1 650 (një mijë e gjashtëqind e pesëdhjetë) lekë, ndërsa vlera e rimbursimit të paketës së barnave për skemën 2 të trajtimit (forma e mesme) do të jetë jo më shumë se 10 900 (dhjetë mijë e nëntëqind) lekë.
