Kryetarja e LSI, Monika Kryemadhi ka reaguar në lidhje me dorëheqjen e Presidentit të Kosovës, Hashim Thaçi pas konfirmimit të aktakuzës ndaj tij për krime lufte.
Për Kryemadhin, Kosova u përfshi në një luftë të padëshiruar e cila u kurorëzua me pavarësinë e tij.
Kryemadhi thotë se ata që nuk ju trembën Millosheviçit nuk ka drejtësi që mund t’i ulë dinjitetin për atë që përfaqësojnë.
”Djemtë dhe vajzat e Kosovës së pafajshme u përfshinë në një luftë të padëshiruar, e certifikuar si e drejtë nga drejtësia ndërkombëtare dhe që u kurorëzua me pavarësinë e Kosovës. Ata që nuk ju trembën Millosheviçit nuk ka drejtësi që mund t’i ulë dinjitetin për atë që përfaqësojnë. Si edhe më parë, shpreh bindjen e palëkundur se e drejta do të triumfojë përsëri!’’, shkruan Kryemadhi në rrjetin social, Facebook.
Gjykata Speciale konfirmoi aktakuzat për krime lufte ndaj presidentit të Kosovës, Hashim Thaçit dhe kryetarit të Partisë Demokratike të Kosovës, Kadri Veseli.
Presidenti Thaçi dha dorëheqje nga posti duke thënë se nuk dëshiron të shkojë para Dhomave të Specializuara si president i Kosovës.
Të mërkurën edhe ish-kryetarit të Kuvendit të Kosovës, Jakup Krasniqi dhe shefit të Grupit Parlamentar të Lëvizjes Vetëvendosje, Rexhep Selimi iu është konfirmuara aktakuza dhe tashmë janë transferuar në Hagë.
