Jo vetëm në Shqipëri, por edhe në SHBA kanë ndodhur paradokse sa i takon pjesëmarrjes së kandidatëve që kanë ndërruar jetë. Një ngjarje jo e zakontë ka ndodhur në Dakotën e Veriut, ku një kandidat për Kongresin i cili muajin e kaluar ndërroi jetë nga COVID-19, ka fituar në zgjedhjet e 3 nëntorit në SHBA. Bëhet fjalë për republikanin David Andahl, që ndërroi jetë në moshën 55-vjeçare nga koronavirusi.
Megjithatë ai u zgjodh për të përfaqësuar distriktin e 8 në Dhomën e Përfaqësuesve të këtij shteti. Andahl vdiq pasi u shtrua në spital për rreth katër ditë. Kështu është shprehur nëna e të ndjerit, Pat Andahl. Ajo ka thënë ndër të tjera se i biri ishte shumë i kujdesshëm për pandeminë, dhe mezi priste të fitonte në zgjedhje.
“Ai ishte shumë i ndjeshëm ndaj vendit të tij, donte të përmirësonte gjërat për fermerët, sidomos dhe industrinë e qymyrgurit”.
Dakota e Veriut ka regjistruar një rritje dramatike të rasteve gjatë muajit të fundit.
