Një studim i fundit kryer nga shkencëtarët, ka dalë në përfundimin se në Itali qarkullojnë 5 variante të COVID-19. Një studim i Task Forcave të qendrës së bioteknologjisë së avancuar në Napoli, ka shpjeguar se virusi ka pësuar mutacione, por për të nxjerrë përfundim më të qartë do të duhen eksperimente më të avancuara. Në studim thuhet se virusi nuk është më pak i rrezikshëm, për më tepër që vijon të shumohet në mënyrë efikase.
“Nga të dhënat e deritanishme të bazuara në 246 gjenome të pacientëve me COVID-19, del se janë 5 lloje të virusit”, i tha agjencisë ANSA gjenetisti Massimo Zollo. Ai thotë se variantet e identifikuara janë 19A, 19B, 20A, 20B dhe 20C, të shpërndarë në të gjithë Italinë. Tani po punohet për të parë shpërndarjen e tyre nëpër rajone.
Italia po përballet me dy situata, në njërën anë kriza e shkaktuar nga Covid-19, dhe në anën tjetër edhe nga vala e protestave që ka përfshirë vendin nga veriu në jug të Italisë.
Ndryshe nga vala e parë, Italia tani është më e përgatitur, spitalet janë në gjendje ti bëjnë ballë sëmundjes.
Sa i takon masave të marra nga qeveria Conte, për mbylljen e bareve dhe restoranteve, kjo masë ka bërë që të revoltohen shumë persona që punojnë në këtë sektor.
