Sikundër ishte njoftuar më herët nga ana e kryeministrit Rama dhe ministres Manastirliu, nga sot pritet të hapen ambientet e mbyllura të bareve, restoranteve dhe pishinave.
Të gjithë qytetarët, pa përjashtim do të kenë mundësinë të konsumojnë një kafe në ambientet e brendshme të lokaleve, të hanë një drekë ose darkë brenda në restorant, apo të frekuentojnë pishinat e mbyllura.
Vendimi është marrë në Komitetin Teknik të Ekspertëve, ku thuhet se hapja e këtyre bizneseve në ambientet e mbyllura, do të shoqërohet me një protokoll masash, që do duhet të zbatohen në mënyrë rigoroze. Sipas protokollit, në ambientet e mbyllura të bareve, restoranteve, duhet të ketë një korridor të dedikuar për klientët deri në arkë dhe një korridor për daljen nga ambienti, në mënyrë që klientët të mos kenë kontakt me njëri tjetrin.
Po kështu nëpër lokale nuk do të ketë vetëshërbim, dhe lokalet duhet të shërbejnë me menu elektronike ose të plastifikuara që të dezinfektohen vazhdimisht.
Në ambientet e brendshme të këtyre bizneseve, do të respektohet distanca prej 1.5 metër mes klientit dhe stafit, ndërsa tavolinat duhet të jenë në distancë me njëra-tjetrën 2 metra.
Nëse pagesa bëhet në arkë, duhet vendosur një xham peçikllazi midis punonjësit dhe klientit. Pastrimi, dezinfektimi dhe ajrosja e bareve dhe restoranteve duhet të jetë në mënyrë të përsëritur disa herë në ditë, që nga ambientet deri tek dorezat e dyerve, tavolinat, tabakatë dhe çdo sipërfaqe tjetër.
Në pishina, ajrosja e ambientetit duhet të bëhet 5 herë në ditë dhe duhet të dezinfektohet 3 herë në ditë. Asnjë personel nuk do të lejohet të punojë me temperaturë 37.5 dhe secili prej tyre është i detyruar të deklarojë nëse ka pasur kontakte me persona të infektuar. Po kështu të gjithë punonjësit duhet të mbajnë maskë, dhe për çdo simptomë të shfaqur duhet lajmëruar mjeku i familjes ose 127.
Në pishina, nëse evidentohet vetëm një rast me covid, do të mbyllet menjëherë i gjithë aktiviteti, pavarësisht hetimit epidemiologjik. Ato do të funksionojnë me orar dhe numri i frekuentuesve do të përcaktohet në varësi të hapësirës së biznesit.
