Bizneset vuajtën pasojat e koronavirusit. Shumë prej tyre kapitulluan, e shumë të tjera janë në fije të perit, duke mos gjeneruar shumë të ardhura. Ndodhur në kushtet kur kriza ka pllakosur ngado, kryeministri Edi Rama ka dhënë një lajm të mirë. Ai ka njoftuar se do të hapen ambientet e brendshme të lokaleve. Në këtë formë, bizneset do kenë mundësi që të marrin frymë, pasi ishin drejt rrënimit.
Gjatë një takimi që zhvilloi me bizneset, Rama apeloi që të respektohen masat, pasi Covid nuk është shaka.
“I thërrisni pak mendjes, dhe i rrisni pak rrogën. Shqipëria si asnjë vend tjetër pa taksa për biznesin e vogël deri në 2029. Sot do të dalë njoftimi i Ministrisë së Shëndetësisë për hapjen brenda të lokaleve. Se është problem tani që fillon koha më e ftohtë. Por duke respektuar masat, mos e merreni me shaka Covid-in. Larg qoftë për secilin. Të jeni mirë dhe shëndet. Puna mbarë”, tha Rama.
“Ajo që është thelbësorja që kemi diskutuar përveç heqjes së TVSH-së për biznesin e vogël, është që t’u çlirojmë nga çdo lloj inspektori. Pjesa më e madhe e tyre e bëjnë detyrën me korrektesë. Heqja e TVSH ishte gjëja më e mirë për biznesin. E nisëm deri në 80 milionë që bëmë një zbritje të fortë gjysmë për gjysmë të taksës që ishte më parë, dhe pastaj e shtrimë në 120 milionë. Tani e çuam në 140 milion. Deri tek 100 pa taksa, pa TVSH, tek 140 milionë pa taksa por me TVSH. Gjeja më e rëndësishme është se do shpëtoni nga çdo kontroll inspektimi dhe faturë, por duke monitoruar respektimin për punonjësit, sigurimet shëndetësore e shoqërore”, shtoi më tej Rama.
