Pak ditë më parë, gjyqtarja Mimoza Margjeka është pezulluar nga detyra në mënyrë unanime nga KLGJ. Margjeka u akuzua për korrupsion pasi nxori nga qelia Orion Balin të akuzuar për trafik emigrantësh.
Nga përgjimet e SPAK doli që gjyqtarja bashkë me bashkëshortin e saj dhe një avokat, i kanë marrë një shumë prej 6 mijë eurosh një të arrestuari, me qëllim për ta liruar nga burgu.
Gjyqtarja Mimoza Margjeka, e cila ndodhet nën masën e sigurisë “arrest shtëpie”, ka kërkuar leje nga SPAK, për të vizituar vajzën e saj në spital.
“Gjatë kohës që ndodhem në masë “arrest shtëpie”, vajza ime ka manifestuar një gjendje hemorragjie, gjak nga hundët, ngjarje e ndodhur në datën 15.09.2020. Kam njoftuar mjekun e lagjes, i cili nëpërmjet rekomandimit me shkrim ka udhëzuar për vizitë klinike pranë specialistit përkatës.
Në kushtet që ndodhem në “arrest shtëpie”, e kam të pamundur të asistoj vizitat dhe mjekimin e vajzës, për shkak se edhe bashkëshorti siç edhe jeni në dijeni ndodhet në paraburgim me vendim gjykate, dhe nuk kam njerëz të tjerë familjare apo të afërm të më ndihmojnë.
Ju lutem më mundësoni nëpërmjet ndonjë akti shkresor të lëshuar nga ju, miratimin e shoqërimit të vajzës në kryerjen e vizitave mjekësore”, thuhet në shkresën e gjyqtares.
Në përgjigje, Prokuroria e Posaçme ka vendosur të mos e miratojë lejen e gjyqtares.
