Ish-ministri i Jashtëm, Paskal Milo, ka folur rreth cështjes së shumëdebatuar të ditëve të fundit, atë të kufirit detar me Greqinë.
I ftuar në rubrikën “Opinion”, në News24, Milo komentoi deklaratat e kryeministrit grek për zgjerimin e vendit të tij me 12 milje, duke thënë se kjo është një e drejtë ndërkombëtare e Greqisë, e Shqipërisë, apo çdo shteti tjetër ndërkombëtar.
Ai thekson se problemi i kësaj deklarate është nëse ajo u bë në mënyrë të rastësishme, apo ishte përfundim i një negocimi që shqiptarët nuk e dinë.
“Deklarata u bë në një kontekst më të gjerë. Ajo që tha kryeministri grek nuk është se është ndonjë sakrilegj, sepse të drejtën e Greqisë për të kërkuar 12 milje kufirin detar është një e drejtë që rrjedh nga Konventa ndërkombëtare, siç e ka edhe Shqipëria apo çdo vend tjetër bregdetar.
Pra, jemi brenda parimit dhe këtu nuk ka asgjë të keqe të kërkosh shtrirje deri në 12 milje. Problemi është përtej kësaj deklarate, nëse ishte e rastësishme apo përfundim i një negocimi që shqiptarët nuk e dinë. Kryeministri shqiptar e deklaroi hapur që nuk ka marrëveshje apo negociata tani për tani. Unë dua ta besoj se nuk ka, se ky proces nuk mund të jetë i fshehtë.
Mesa jam në dijeni grupi negociator ka mbaruar punë dhe pala negociatore shqiptare ka projektuar, ka një projekt marrëveshjeje, që e ka depozituar, që është nënshkruar nga të gjithë anëtarët e grupit negociator shqiptar, me përjashtim të njërit.
Për rrjedhojë, unë sot kam parë një shkrim të një anëtari të grupit negociator, që ka deklaruar se pretendimi i Greqisë për të shtrirë ujërat territoriale të saj në 12 milje nuk prek kufirin shqiptar. Tani jemi në dilemën sa informacion i saktë është ky që qarkullon”, tha ai.
