Ekzekutivi i Bashkimit Evropian i ka bërë thirrje Turqisë të dialogojë dhe të mos ndërmarrë hapa të njëanshëm, që do përshkallëzonin tensionet me Greqinë në Mesdheun Lindor.
Komisioni paralajmëroi javën e kaluar se nëse dialogu nuk do të sjellë fryte, BE-ja do të ndëshkojë me sanksione Ankaranë.
Brukseli mund t’i propozojë një union të ri doganor Turqisë apo më shumë financime për përballimin e valës së refugjatëve në vend.
Zëdhënësi i diplomacisë evropiane, Peter Stano, tha të hënën se BE-ja radhitet qartësisht krah Qipros dhe Greqisë kur bëhet fjalë për pozitat e tyre përballë Turqisë.
“Fillimi i dialogut është thelbësor, i dialogut serioz, të ndershëm që zgjidh të gjitha çështjet e hapura. Vetëm me negociata sigurohet shtensionimi i situatës dhe rruga drejt stabilitetit e zgjidhjeve afatgjata, që janë kaq të nevojshme për raportet tona me Turqinë si fqinje dhe partnere”, tha ai.
Më e palëkundur dhe kërcënuese në këtë situatë vazhdon të paraqitet Ankaraja, siç e tregoi të dielën edhe deklarata e presidentit Recep Tayip Erdogan.
“A është i ndërgjegjshëm populli grek se çfarë e pret për shkak të sundimtarëve të vet ambiciozë dhe inkompententë? Kushdo që na ka përballur në tokë, në det a në ajër, e di vendosmërinë e Turqisë për të mbrojtur interesat legjitime sipas ligjeve ndërkombëtare. Ata që nuk e dinë, këtë realitet do ta mësojnë në fushë, në tryezë a në platformat ndërkombëtare”, tha ai.
