Bashkia e Urës Vajgurore ka ndryshuar emrin. Nga sot e tutje ajo do të quhet Dimal. Vendimi është marrë sot në mbledhjen e Këshillit Bashkiak, ku është votuar ndryshimi i emrit.
Bashkia e Urës-Vajgurore do mbaj emrin e Dimalit, ndonëse prej sistemit komunist është quajtur Urë-Vajgurore, pasi kjo qytezë prodhonte lëndën djegëse “vajgurin”.
Propozimi për ndryshimin e emrit ka ardhur nga vetë banorët dhe disa intelektualë të zonës, dhe ideja e këtij emërtimi erdhi pas zbulimit të qytetit antik të periudhës Ilire “Dimal”, rrënojat e të cilit u zbuluan në kodrën e qytetit të Urës-Vajgurore.
Pas propozimeve të bëra, mësohet se Bashkia është konsultuar me qytetarët nëpërmjet shumë takimeve të organizuara me ta, ku është vërejtur dëshira unanime për ndryshimin e emrit. Ndryshimi i emrit bëhet edhe për ta kthyer qytetin tashmë afër rrënojave të qytetit antik, në një destinacion turistik, kulturor dhe arkeologjik.
