Lideri socialdemokrat në Maqedoninë e Veriut, Zoran Zaev, ka ritheksuar se nuk do ta pranojë kushtin e BDI-së për kryeministër shqiptar.
Gjatë një debati televiziv me kreun e opozitës Hristijan Mickoski, Zaev tha se është i gatshëm t’i japë deputetë VMRO-DPMNE-së opozitare për të formuar qeveri pakice.
“Nëse ky është kushti që të jemi me BDI-në, nuk do të negociojmë me ta. Jam i gatshëm t’i jap 13 deputetë Mickoskit që ai të formojë qeveri pakice, ose do të kërkoj nga ai të më japë 6 deputetë që ne ta formojmë qeverinë. Përmes shantazheve nuk do të bisedojmë”, tha ai.
Kreu i BDI-së, Ali Ahmeti thotë se ashtu si u zgjodhën Kryeparlamentari, Ministri i Brendshëm e i Mbrojtjes, Kryetari i Gjykatës Kushtetuese shqiptarët në Maqedoninë e Veriut mund të kenë edhe Kryeministrin.
“Me kryeministër shqiptar rritet lojaliteti i shqiptarëve ndaj shtetit. Me kryeministër shqiptar forcohet integriteti dhe sovraniteti i shtetit. Ne nuk marrim hisen e tjetër kujt, pasi të huajin kurrë nuk e kemi dashur, por për hisen tonë gjak kemi derdhur”, tha Ahmeti.
Komisioni Shtetëror i Zgjedhjeve në Maqedoninë e Veriut ka përmbyll listën zgjedhore, ndërsa zgjedhjet do të mbahen më 15 korrik.
