Avokati Kujtim Cakrani është dhunuar mëngjesin e sotëm në Vlorë, nga dy persona. Ngjarja ka ndodhur në zyrën e tij. Agresorët të cilët janë identifikuar, e kanë sharë dhe më pas goditur Cakranin.
Sipas tij, dhuna ka ardhur për shkak të detyrës, pasi po mbron një person i cili është rrëmbyer. Në një deklaratë për mediat, avokati është shprehur se është kërcënuar edhe herë të tjera nga këta persona, të cilët kësaj radhe i erdhën deri në zyrë.
Policia e Vlorës ka reaguar në lidhje me denoncimin e bërë sot në komisariatin e qytetit bregdetar nga avokati Kujtim Cakrani. Ky i fundit ka kallëzuar në komisariat se është dhunuar nga dy persona. Policia thotë se pas marrjes së deponimit, po punohet për identifikimin dhe kapjen e autorëve.
Njoftimi i policisë:
Vlorë
Në ambientet e Drejtorisë Vendore të Policisë Vlorë është paraqitur shtetasi K. C me profesion Avokat, i cili ka bërë kallëzim se në orët e para të mëngjesit të ditës së sotme, në rrugën “Petoshati” Vlorë, dy persona ende të paidentifikuar dyshohet se e kanë goditur fizikisht me grushta për shkak të detyrës. Policia po punon për zbardhjen dhe sqarimin e rrethanave si dhe për identifikimin dhe kapjen e autorëve.
