Gazetari i lajmeve në Top Channel, Ilir Paço, ka mohuar në mënyrë kategorike lajmet se ai i dërgonte ‘zemra’ në rrjetet sociale, statuseve për Kostandinos Kaçifas.
Më herët, mediat publikuan ‘screen shot’ të Ilir Paços që i jepte ‘zemra’ statuseve për ekstremistin grek Kostandinos Kaçifas, i cili mbeti i vrarë në Bularat.
Ndër të tjera ishte edhe një koment ku shkruante ‘i pavdekshem’, referuar figurës së Kaçifas, mirëpo vetë Ilir Paço e mohon gjithë këtë.
Kaq ka mjaftuar dhe komentuesit kanë hyrë në profilin e tij, duke e sharë e ofenduar.
Ai thotë për ‘newsbomb.al’ se nuk ka profil në rrjetet sociale, dhe se e gjitha është sajuar.
Ndërkaq, shumë akuzojnë se Paço e mbylli Facebook-un, menjëherë pas valës së reagimeve kundër tij.
Kostandinos Kacifas u vra më 28 tetor 2018, gjatë një shkëmbimi zjarri me forcat RENEA. Ditën e varrimit, në Bularat, erdhën rreth 1500 nacionalistë grekë që e përcollën 35-vjeçarin drejt banesës së fundit, të veshur me rroba ushtarake. Vrasja e tij shkaktoi shumë tensione mes dy vendeve fqinje.
