Ditën e sotme, përfaqësues të Shoqatave të Transportit Publik dhe punonjës të kompanive janë mbledhur për të protestuar para Ministrisë së Infrastrukturës.
Ata kanë kërkuar të revoltuar ndihmë financiare nga qeveria.
“Nëse qeveria do që të zbatojmë protokollin, qeveria duhet të mbështesë me ndihmë financiare. Protokolli mund të zbatohet, por jo 100%.
Protesta do të vazhdojë deri sa ne të vazhdojmë punën ose të na japi ndihmë financiare.
Mori 640 mln euro kredi, ku janë këto para? Ne duam një paketë ndihmë financiare, janë 400 mijë lekë që kemi marrë, nga ato 200 mijë na kanë ikur ujë drita, kërkojmë një pagesë të tretë.
Me 400 mijë lekë ça bën Edi Rama për 4 muaj? I bie 50 mijë lekë muaji, ça bëhet?”, u shpreh njëri prej protestuesve, shkruan “opinion.al”.
Ndërkohë në protestë ka ndërhyrë policia, e cila iu ka bërë thirrje atyre që të shpërndahen.
“Do të shoqëroheni në komisariat nëse nuk shpërndaheni vetë”, bëri thirrje me megafon një polic.
Mirëpo protestuesit kanë refuzuar që të largohen.
Kujtojmë se ditën e djeshme kryeministri Edi Rama paralajmëroi se nuk do të lejohen grumbullimet e njerëzve për shkak të situatës së krijuar nga koronavirusi.
