Damian Gjiknuri ka folur mbrëmjen e sotme në emisionin “Zonë e Lirë”, lidhur me akuzat që janë bërë në adresë të tij për falsifikimin tek Unaza e Re dhe për zgjedhjet lokale në Dibër. Ai tha me ironi se kur ngjitesh lart, të godasin më shumë. Duke qëndruar në të njëjtën linjë, Gjiknuri u shpreh se goditja nga kundërshtarët është e pritshme, sa herë që bën gjëra të mira.
“Ka një parim, kur ngjitesh lart të godasin, kur je në pushtet të godasin. Por për sa i përket akuzave, Prokuroria i ka hetuar dhe ka thënë që janë akuza politike. Është hetuar dhe falsifikimi tek Unaza e Re dhe nuk gjetën asnjë lidhje me mua. Por akuza do ketë sa herë bën gjëra të mira do të godasin”, tha deputeti i PS.
Ai foli dhe për “çunat problematikë” dhe përgjimet për zgjedhjet lokale të Dibrës, duke shtuar se gjithçka që ka bërë Prokuroria ka qënë një paligjshmëri. “Por po të flasim për Dibrën është një përgjim i paligjshëm, që përgjuan gjysmën e shtetit. I ka përgjuar Prokuroria e Krimeve të Rënda, por nuk i takon. Por po të futesh e të përgjosh të gjitha shtabet politike këto gjëra ndodhin, ka dhe më shumë”, përfundoi ai.
