Zyra e Bashkimit Evropian në Kosovë dhe shefat e misioneve të BE-së, i janë drejtuar me një mesazh të qartë politikanëve në Kosovë, që të zbatojnë vendimin e Gjykatës Kushtetuese. Një vendim që e shpalli të ligjshëm dekretin për mandatimin e Avdullah Hotit për formimin e qeverisë së re. Shefja e zyrës së BE-së në Kosovë, Nataliya Apostolova dhe shefat e misioneve të BE-së në Kosovë, kanë ftuar të gjithë aktorët politikë të Kosovës, që ta zbatojnë atë.
Në një deklaratë të lëshuar nga zyra e BE-së në Kosovë, thuhet se tani i takon Kuvendit që të ndërmarr hapat e nevojshëm kushtetues, në përputhje me vendimin e Gjykatës.
“BE u bën thirrje të gjithë liderëve politikë, që të përmbahen nga gjuha nxitëse dhe ta shprehin mospajtimin e tyre ekskluzivisht në mënyrë paqësore dhe demokratike”, thuhet në deklaratë.
Gjykata Kushtetuese publikoi vendimin e marrë lidhur me dekretin e presidentit Hashim Thaçi, për dekretimin e Avdullah Hotit si kryeministër të Kosovës.
Një ditë pasi Gjykata Kushtetuese e shpalli të rregullt dekretin e tij për të mandatuar Avdullah Hotin nga Lidhja Demokratike e Kosovës për postin e kryeministrit, Presidenti i Kosovës, Hashim Thaçi i ka bërë thirrje të gjithë institucioneve dhe partive politike që të zbatojnë vendimet e Gjykatës Kushtetuese. Nga ana tjetër, ky vendim u kundërshtua nga Lëvizja Vetëvendosje, të cilët deklaruan se po shqyrtojnë të gjitha opsionet e kundërshtimit të vendimit të Kushtetueses.
