Edhe pse vijon të mbetet një nga vendet që shënon më shumë viktima në Evropë, Mbretëria e Bashkuar ka marrë vendimin për të rihapur kufijtë e saj.
Sipas mediave britanike, duke filluar nga data 8 qershor do të lejohen udhëtimet hyrëse dhe dalëse nga vendi.
Por për të gjithë udhëtarët, Britania do të vendosë karantinë të detyruar për të parandaluar një valë të dytë koronavirusi. Çdokush që hyn apo kthehet në Britani do të jetë i detyruar të qëndrojë në karantinë 14-ditore.
Autoritetet vendase shprehen se ky vendim është marrë pasi shihet një rënie e kurbës. Por pavarësisht kësaj, MB vijon të jetë një ndër shtetet që regjistron numrin më të lartë të viktimave brenda një dite.
Mbretëria e Bashkuar shënon numrin e dytë më të madh të vdekjeve nga koronavirusi në botë (36,393), pas SHBA-ve (97,014).
Me mbi 254 mijë raste të konfirmuara pozitive, MB renditet e pesta në botë për numrin më të lartë të personave të infektuar, pas SHBA-ve, Rusisë, Brazilit dhe Spanjës.
