Kryeministri grek, Kyriakos Mitsotakis ka bërë me dije se sezoni turistik në Greqi do të hapet më datë 15 qershor.
Gjatë një fjalimi televiziv, Mitsotakis njoftoi se fluturimet ndërkombëtare do të rifillojnë më 1 korrik.
“Periudha e turizmit fillon më 15 qershor. Hotelet sezonale mund të rihapen, dhe fluturimet e drejtpërdrejta ndërkombëtare në destinacionet tona turistike gradualisht do të fillojnë nga 1 korriku. Ne do të fitojmë luftën me krizën ekonomike, ashtu siç e kemi fituar betejën shëndetësore”, tha ai.
Greqia ende është duke u rimëkëmbur nga një krize financiare, në të cilën ishte zhytur rreth 10 vite më parë. Të ardhurat nga turizmi llogaritet se mbushin një të pestën e ekonomisë greke.
AFP raporton se për të tërhequr vizitorët, taksa e transportit për 5 muajt e ardhshëm do të ulet në 13%, nga 24% sa është aktualisht.
Greqia regjistron deri më tani 2,850 raste infektimi nga COVID-19 dhe 161 viktima.
