Ish-deputetja demokrate, Albana Vokshi tha se është dhunuar nga policia në protestën për shembjen e Teatrit Kombëtar.
E ftuar në rubrikën “Opinion” në News24, Vokshi shtoi se edhe kolegia e saj e LSI-së, Silva Caka është fyer me një fjalor banal dhe është dhunuar brenda makinës së policisë.
“Është e pritshme, kam qenë bashkë me shumë qytetarë në dhjetëra-qindra protesta, policia ka ushtruar dhe herë tjetër dhunë ndaj meje. Unë kam qenë dhe do vazhdoj të jem atje, në mbrojtje të të drejtave të qytetarëve. Jam e trishtuar, e demoralizuar, kam një ngërç në fyt, që s’po mundem ta largoj, por nuk jam e dorëzuar. Dhuna e policisë ndaj meje, është dhuna e po të njëjtës polici që ushtroi ndaj koleges sime Silva Caka, brenda mjetit të policisë. Kam parë shenjat e dhunës, e kanë fyer me fjalorin më banal”, tha ajo.
Sipas Vokshit, vendimi për shembjen e Teatrit Kombëtar ishte antiligjor, antikombëtar dhe antievropian.
Ish-deputetja theksoi se kur PD të vijë në pushtet do t’i rikthejë statusin monument kulture Teatrit Kombëtar, si dhe do ta rikthejë ashtu siç ishte godinën.
“Ka jo vetëm trishtim, por edhe zemërim për aktin e rëndë të Edi Ramës ndaj kulturës. Ishte një akt dhune kriminale, një akt antikombëtar dhe një akt antievropian. Qytetarët kanë nisur mosbindjen civile, edhe pse jemi ende në ditët e fatkeqësisë natyrore, por qytetarët nuk i binden më urdhrave të Ramës. Janë të gjithë qytetarët, që tashmë kanë dalë me parullat ‘poshtë diktatura’. Teatri ishte vija e kuqe ndarëse mes një vendi që do të jetojë në demokraci apo do të pranojë instalimin e një regjimi diktatorial. Edhe vetë personalisht e kam ndjerë shumë tronditjen ndaj këtij akti makabër, talibanez.
Edi Rama ka kryer si një taliban i vërtetë, duke cuar në mes të natës forcat policore të armatosur deri në dhëmbë, në paligjshmëri totale. Edi Rama si një burracak, frikacak, nuk guxoi të përballet me artistët, me qytetarët, që kanë ndenjur për dy vite e gjysmë për të mbrojtur teatrin. Edi Rama doli kundër të gjithë zërave që kërkonin të mbronin këtë vlerë kulturore. Unë si vajzë e rritur në Tiranë kam shumë kujtime me Teatrin Kombëtar. Shumë familje nga e gjithë Shqipëria kanë kujtime, botën e tyre shpirtërore të lidhur me godinën e Teatrit Kombëtar. Ka zemërim pafund te çdo qytetar shqiptar dhe ky zemërim është e sigurt që do të përshkallëzohet në ditët në vijim. Të gjithë qytetarët shqiptarë po ngrihen për të ruajtur lirinë dhe demokracinë në Shqipëri”, shtoi ajo.
