Gazetari Bledi Strakosha ka qenë mjaft i drejtëpërdrejtë në një intervistë të dhënë së fundmi në ‘Glamour Zone’, ku dhe tregoi arsyen se pse e kishin pushuar nga puna në një televizion.
Ai tregoi arsyen përse e pushuan nga televizioni ‘Agon Channel’, e ndërsa gjithçka kishte ndodhur për një status në Facebook. Një koment ironik tek një status i koleges së tij, ishte kthyer në një ‘mollë sherri’. Kaq mjaftoi që të merrej vendimi ndaj tij, ndonëse nuk përmendej në kontratë një gjë e tillë.
Më the që e quan të padrejtë arsyen pse “Agon Channel” të pushoi nga puna. Pse? Ishte çështje imazhi?
“Ideja është këtu, që ne kishim një garderobë të krijuar nga pronari i televizionit. Qetësori, se po e them edhe me emër, kishte marrë një palë pantallona të miat ngjyrë bezhë për të shkuar diku.
Jo në xhirime, por për arsye personale. Dhe ato pantallona që shkova ti vishja për emisionin, ishin në gjendjen më të keqe të mundshme. Dhe në atë kohë, Daniela Kostandini që punonte në “Klan” ishte shtatzane dhe ankohej në një status e thoshte: “Shoh një kolege që ka veshur xhaketën time. Kjo do të thotë që kur unë të kthehem duhet ta hedh atë xhaketë?” Dhe unë që i shkruaj koment: “Mos u anko, sepse mua mi kanë marr pantallonat për të shkuar në dasmë”. Kjo ishte e gjitha. Dhe me këtë unë kisha bërë një çudi të madhe, sepse kisha nxjerr kofidencialitetin e televizionit. Gjë që nuk ishte kërkuar as në kontratë”.
