Ministrja e Shëndetësisë dhe e Mbrojtjes Sociale doli sot në një deklaratë për mediat, ku njoftoi masat lehtësuese për ditët në vijim.
Manastirliu tha se nëse të dhënat do të jenë të qëndrueshme, nga data 1 qershor planifikohet të lejohet hapja e çerdheve dhe e kopshteve publike dhe private.
“Dëshiroj të ndalem këtu, duke theksuar nevojën e një vlerësimi të thellë dhe shumë të kujdesshëm të kushteve higjieno-sanitare për çdo strukturë të kopshteve dhe çerdheve dhe standardeve që duhet të plotësojnë për të mirëpritur fëmijët në këto institucione me rregullat e reja. Protokollet e sigurisë do të bëhen të njohura në ditët në vijim, ku dhe do të ngarkohen për zbatim të gjithë institucionet përgjegjëse për plotësimin e tyre deri në këtë datë”, tha ajo.
Ministrja prezantoi këtë mbrëmje planin e rihapjes së aktiviteteve, që vijojnë të mbyllura prej më shumë se dy muajsh, për shkak të përhapjes së koronavirusit.
Gjithashtu ajo bëri me dije se nga 11 maji, pjesë e zonës së gjelbërt do të jenë gjithsej 14 bashki.
