Pas takimit me përfaqësuesit e Shoqatës së Biznesit të Vogël, kreu i PD-së Lulzim Basha u shpreh se biznesi i vogël po përballet më vështirësi të mëdha. Ishte ky shqetësimi i parashtruar nga kryedemokrati Basha, ndërsa kërkoi që të mbështeten kërkesat e tyre.
Po kështu, Basha kërkoi lehtësi fiskale për biznesin e vogël, ndërsa akuzoi qeverinë se gjithë vemendjen e kanë tek oligarkët. Ai tha më tej në një prononcim për mediat se zhytja e biznesit të vogël, nuk është gjë tjetër veçse parathënie e krizës ekonomike.
“Gjithë vëmendja e qeverisë është tek oligarkët, jo tek njerëzit, jo te biznesi i vogël. Biznesi i vogël përbën bazën e ekonomisë shqiptare. Paratë që ka paguar gjatë vitit, taksat duhet t’i kthehen sot.
Sot ka nevojë më shumë se kurrë për një paketë të qartë masash. Biznesi i vogël po vuan dhe nga masa arbitrare siç është fatura afrofe.
Në vend që të ndihmohen siç po i ndihmon çdo vend i rajonit, biznesi i vogël po përballet me vështirësi të jashtëzakonshme.
Paratë e taksave të shqiptarëve po shkojnë tek oligarkët, jo atje ku ka nevojë tek biznesi i vogël. Situata është dramatike.
Mbështesim kërkesat e biznesit të vogël. Zhytja e biznesit të vogël në këtë situatë, është parathënie e krizës ekonomike. Vëmendja jonë duhet të jetë tek pandemia ekonomike 2020 që po zëvendëson pandeminë e COVID.
Ka një shkaktar për këtë, kryeministri dhe kjo qeveri. Biznesi i vogël nuk kërkon lëmoshë, por të mbështetet nga taksat. Taksat përfundojnë tek një grusht njerëzish, tek një grusht oligarkësh me të cilët kjo qeveri ndan favoret”, deklaroi Basha.
