Pas një kohe të gjatë të izoluar, më në fund italianët do të shijojnë pak liri. Ata mund të dalin lirisht në rajonin e tyre, të vizitojnë të afërmit apo të shkojnë në parqe. Në Itali numërohen 210 mijë raste me koronavirus dhe 28 884 viktima, bilanc ky që konsiderohet si ndër më dramatikët në Europë.
Sipas vlerësimeve të bëra, nga sot më shumë se 4 milionë persona janë rikthyer në vendet e punës. Kryeministri Conte nuk ka qëndruar në heshtje. Ai ka dhënë mesazhet e radhës, në lidhje me kushtet që duhet të plotësojnë për këtë liri të munguar.
Conte ka apeluar ndaj të gjithë qytetarëve, që të mos e shpërdorojnë progresin e arritur duke neglizhuar kontrollet e higjienës dhe duke lejuar infeksionet e reja. “Sot më shumë se kurrë, fati i kombit tonë është në duart tona”, u shpreh kreu i qeverisë.
“4 maji nuk është i gjithi falas, kuptimi i përbashkët është i nevojshëm, tani gjithçka është në duart tona”, paralajmëroi kryeministri Giuseppe Conte.
