Aktori i ri nga Mirdita që jeton në Shtetet e Bashkuara të Amerikës, Julian Gjaçi, prej 11 ditësh është i infektuar nga koronavirusi. Në një lidhje direkte me emisionin “Zonë e Lirë” të Arjan Çanit, ai ka treguar shenjat e para të infeksionit dhe mjekimin që i kanë dhënë mjekët në Amerikë. Nga spitali ku dhe ndodhej i shtruar, ai tha se tashmë gjendja e tij është më mirë.
“Tre ditët e para, m’u duk si ftohje e lehtë. Ditën e katërt ndjeva vështirësi në frymëmarrje, më thanë të shkoja në urgjencë. Bëra testin, dola pozitiv. Më thanë shko në shtëpi, por unë u ndjeva më keq. Më dhanë ibuprofen, por ishte gabim se ishte shumë i keq. I thash po bëhem keq, duhet të vij në urgjencë, por më thanë se vetëm nëse je duke vdekur do vish këtu. Mora doktoreshën time personale dhe lash takim. Kur shkova në takim, ajo po më fliste dhe çdo sekondë që kalonte, po fikesha. Më mori dhe më ka sjellë në urgjencë, e cila është vetëm për Covid-19”, tregoi ai.
“Di gjë me çfarë mjekimi të kanë mjekuar?”, e e pyeti mjeku Pipero. “Tani kam marrë hidroksilklorokine dhe oksigjen. Më kanë bërë gjilpërë për hollim gjaku. Të gjitha simptomat e mundshme i kam pasur në të njëjtën kohë”, është përgjigjur Juliani, ndërsa ka shtuar se nuk ka asnjë sëmundje kronike. “Cigarja elektronike më jepte pak disavantazh”, u shpreh aktori i ri nga Mirdita, por që jeton në SHBA.
“Tek ne nuk ndodh që të shtrojmë në spital, kur je në rrezik për të vdekur. Kam mjekuar në distancë nga këtu disa raste në Amerikë, kam këshilluar mjekët atje sepse mjekët që kanë qenë në spital kanë thënë se nuk janë specialistë. Të paktën ata që kam komunikuar unë. Kjo që i ka ndodhur Julianit, i ka ndodhur dhe të tjerëve. Kështu që këtë e solla për të dëgjuar juve, por dhe unë, për të dëgjuar çfarë ndodh në Amerikë”, tha Pipero.
