Besimtarët myslimanë kanë nisur sot muajin e Shenjtë të Ramazanit. Kryeministri Rama e ka nisur ditën me disa fjalë të shenjta të Profetit Muhamed, që përkojnë pikërisht me këtë moment të veçantë për të gjithë besimtarët myslimanë që agjërojnë.
“Kush agjëron Ramazanin me bindje dhe shpresë, në shpërblim i falen mëkatet e bëra”, janë fjalët e shenjta të Profetit Muhamed, që kryeministri Rama ka shpërndarë në Facebook.
Agjërimi i Ramazanit, është një nga shtyllat dhe detyrat madhore të besimit islam. Ramazani është muaji ku besimtarët myslimanë ndërpresin ushqimin e pijen, duke filluar që nga nisja e agimit deri në perëndim të diellit (nga syfyri deri në iftar).
Është një muaj i vlerave të larta njerëzore, morale e sociale, muaji i solidaritetit dhe bashkëpunimit, muaji dedikuar më shumë adhurimit dhe këndimit të Kuranit, muaji i sadakasë dhe i mirëbërësisë, muaji i mëshirës, virtytit dhe dhembshurisë.
