Një lajm i mirë vjen nga Mbretëria e Bashkuar, ku pritet të testohet vaksina e koronavirusit tek njeriu.
Sekretari i Ministrisë së Shëndetësisë britanike, Matt Hancock bëri me dije se testimi do të bëhet ditën e enjte. Hancock sqaroi se kjo vaksinë është zhvilluar nga studiuesit e Universitetit të Oxford-it.
“Në periudha normale, arritja në këtë fazë do të zgjaste me vite dhe unë jam shumë krenar për punën e bërë deri më tani”, tha ai në një konferencë për shtyp.
Më tej ai tha se do të vërë në dispozicion të shkencëtarëve në Oxford 20 milion £ (24.5 milion dollarë), si dhe një shtesë prej 22.5 milion £ në fonde për studiuesit në Imperial College London
Mbretëria e Bashkuar është një nga vendet më të prekura në botë nga virusi vdekjeprurës COVID-19. Që nga shpërthimi i pandemisë, vendi numëron 129,044 raste dhe mbi 17 mijë viktima.
Më shumë se 2,5 milionë njerëz nga e gjithë bota janë prekur nga koronavirusi, ndërsa mbi 175 mijë persona kanë humbur jetën.
