Ministria e Infrastrukturës dhe Energjisë ka bërë publik kalendarin e udhëtimeve që do të bëhen këtë javë, në kuadër të riatdhesimit të shqiptarëve të mbetur të bllokuar jashtë nga situata e krijuar nga koronavirusi.
Sipas këtij kalendari, udhëtimet e para do të zhvillohen më 18 dhe 19 prill. Në datën 18 do të kryhet udhëtimi Stamboll-Tiranë, më pas Tiranë-Romë dhe Romë-Tiranë.
Ndërsa në datën 19, sipas njoftimit të Ministrisë së Infrastrukturës dhe Energjisë, do të kryhen fluturimet Tiranë-Milano dhe Milano-Tiranë.
Ashtu siç është bërë e ditur më herët këtë javë, shtetasit që duan të kthehen duhet që më parë të bëjnë rezervimin në një nga hotelet e vëna në dispozicion dhe më pas të bëjnë rezervimin e biletës.
Ndërkohë në ditët në vijim, janë parashikuar fluturime riatdhesimi edhe nga Bari, Frankfurti, Parisi dhe Londra.
