Mbretëria e Bashkuar është një nga vendet që po shënon viktimat më të shumta në ditët e fundit, për shkak të koronavirusit.
Bilanci ditor i ditës së djeshme (761 viktima) ishte i treti më i larti në botë, pas Francës që shënoi mbi 1,400 viktima dhe SHBA-vë që regjistruan mbi 2 mijë viktima.
Ndërkohë ditën e sotme bilanci duket të jetë përkeqësuar akoma më shumë. Në 24 orët e fundit në Mbretërinë e Bashkuar janë shënuar 861 viktima, 100 më shumë se dje.
Sipas mediave britanike, janë shtuar edhe 4,617 raste të reja duke e çuar në 103,093 numrin total të personave të infektuar nga COVID-19.
Mbretëria e Bashkuar është një nga vendet e vetme, që nuk i ka deklaruar shifrat e personave të shëruar nga ky virus.
Bëhet me dije se 1,519 pacientë të shtruar në spital ndodhen në gjendje kritike për jetën. Mbretëria e Bashkuar renditet e pesta për numrin më të madh të vdekjeve nga koronavirusi (13,729), pas SHBA-ve (28,580), Italisë (21,645), Spanjës (19,130) dhe Francës (17,167).
Më shumë se 2,1 milionë njerëz nga e gjithë bota janë prekur nga COVID-19, ndërsa rreth 137 mijë persona kanë humbur jetën.
