Kryeministrja e Danimarkës, Mette Frederiksen u shpreh se vendi dëshiron të dalë nga izolimi më shpejt nga sa ishte parashikuar më parë.
Kjo pasi sipas kryeministres, numri i të infektuarve nga koronavirusi vdekjeprurës po bie.
“Numri i të personave të shtruar në spital nuk është rritur, por ka rënë. Dhe numri i njerëzve në kujdes intensiv gjithashtu po bie”, tha Frederiksen pa specifikuar detajet e propozimit të qeverisë.
Kryeministrja tha se propozimi për të dalë më herët nga izolimi do të diskutohet të martën, me partitë e tjera në Parlament.
Deri më tani në Danimarkë janë regjistruar 6,496 raste me COVID-19, ndërsa janë shënuar gjithsej 299 viktima.
Ndërkohë më shumë se 2,500 persona në Danimarkë kanë arritur ta mposhtin koronavirusin. Vendi nuk ka publikuar ende bilancin për 24 orët e fundit.
Rreth 2 milionë njerëz nga e gjithë bota janë prekur nga virusi vdekjeprurës, ndërsa mbi 123 mijë persona kanë humbur jetën.
