Gazeta gjermane “Die Welt” i ka kërkuar kancelares Angela Merkel që të ndalet dhe të mos dorëzohet ndaj kërkesave të Italisë.
E përditshmja gjermane i bën thirrje qeverisë që të mos bjerë dakord në lidhje me projektin e Eurobondit. Projekti në fjalë është kundërshtuar bindshëm nga Gjermania dhe Holanda në mbledhjen e ministrave të Financave në BE.
Në artikullin e publikuar online shkruhet ndër të tjera, se mafia në Itali mafia po pret financimet nga ana e Bashkimit Evropian.
“Solidariteti duhet treguar me bujari, por pa limite dhe kontrolle? Duhet të jetë e qartë se në Itali, ku mafia është e fortë dhe po pret që të vërshojnë financimet nga Brukseli, fondet duhen derdhur vetëm për sistemin shëndetësor dhe jo për sistemin social dhe fiskal. Natyrisht italianët duhet të kontrollohen nga Brukseli dhe ti përdorin fondet konform rregullave. Edhe në krizën e koronavirusit, parimet themelore duhet të vlejnë akoma”, shkruhet në artikull.
Në lidhje me këtë artikull ka ardhur reagimi i ministrit të Jashtëm, Luigi Di Maio. Në një intervistë për Uno Mattina, Di Maio e cilësoi këtë artikull si një etiketim të turpshëm dhe të papranueshëm, duke shprehur besimin se qeveria gjermane do distancohet.
“Italia qan sot viktimat e koronavirusit dhe është e papranueshme, që në një moment të tillë të vijnë sulme të tilla”, tha ai.
