Në 24 orët e fundit në Spanjë janë shënuar 674 viktima nga koronavirusi.
Për të tretën ditë me radhë, Spanja po tregon një rënie në numrin e personave të vdekur brenda një dite.
Deri para 3 ditësh Spanja regjistronte më shumë se 900 viktima brenda 24 orëve. Numri total i të vdekurve në këtë shtet tani është 12,418, ndërkohë që ka arritur në 130,759 numri i të infektuarve.
Këto të dhëna mund të jenë tregues se Spanja po e kalon më në fund pikun e shpërthimit të koronavirusit. Numri i të vdekurve sot është më i vogli në 10 ditë.
Sipas mediave vendase, kjo është hera e parë prej 26 marsit, që më pak se 700 persona kanë vdekur brenda 24 orëve.
Por kjo nuk do të thotë se situata në Spanjë do të normalizohet, teksa kryeministri Spanjoll ka zgjatur masën e izolimit deri më 26 prill.
Ndërkohë më shumë se 1 milionë e 200 mijë raste infektimi janë raportuar në të gjithë botën, ndërsa 66,502 njerëz kanë ndërruar jetë.
