Deputeti i opozitës së re, Adriatik Alimadhi, i cili më herët ditën e sotme konfirmoi se ishte prekur nga koronavirusi, do të dërgohet në spitalin e Infektivit për mjekim.
Në një prononcim për Abc News, Alimadhi tha se dërgimi i tij në spital po bëhej pasi kryeministri Rama dhe ministrja Manastirliu kanë reaguar, pas statusit të tij të bërë në rrjetet sociale.
Në postimin e tij, deputeti akuzonte kryeministrin Rama për mungesën e infrastrukturës në spitale dhe për autoambulancën e rrënuar, e cila e kishte çuar për në Sanatorium ku edhe bëri analizat.
Alimadhi postoi sot një foto nga shtrati duke konfirmuar se ishte infektuar nga koronavirusi. Gjithashtu ai bëri me dije se edhe bashkëshortja e tij ishte prekur nga virusi Covid-19.
Gjendja e deputetit mësohet se është e stabilizuar, teksa tani e mbrapa ai do të monitorohet nga mjekët tek Spitali Infektiv.
