Ministri i Jashtëm Gent Cakaj ka falenderuar publikisht vendet anëtare të BE-së për dritën jeshile për fillimin e bisedimeve për anëtarësim si dhe për mesazhin e tyre të qartë.
Cakaj shprehet se përparimi i Shqipërisë në rrugëtimin evropian tashmë është i mundur.
“Ne sot falenderojmë vendet anëtare, jo vetëm për dritën jeshile për fillimin e bisedimeve për anëtarësim, por edhe për faktin se kanë dhënë mesazhin e qartë, se në rast të reformave të prekshme, përparimi në rrugëtimin evropian është i mundur.
Kjo vendimmarrje mbetet e rëndësisë historike për Shqipërinë”, tha Cakaj.
Nga ana tjetër, nuk kanë munguar edhe reagimet nga zyrtarë të lartë dhe Ministrat e Jashtëm të Bashkimit Evropian në Twitter.
Ata jo vetëm kanë përgëzuar Shqipërinë dhe shqiptarët për këtë arritje madhore, por edhe kanë vlerësuar punën e bërë në procesin e negociimit.
