Franca ka aprovuar një test të ri online, i cili mund të përdoret për të kontrolluar nëse je i prekur nga koronavirusi apo jo.
Ministria e Shëndetësisë e Francës raporton se ky test nuk është një diagnozë, por një vlerësim i gjendjes së shëndetit për të kuptuar nëse ke simptoma të tilla apo jo.
Testi online është prezantuar që javën e kaluar dhe përmban 24 pyetje në lidhje me shëndetin. Përdoruesve gjithashtu u kërkohet të përgjigjen në mënyrë anonime në pyetjet në lidhje me peshën, lartësinë, moshën e tyre dhe të japin informacion shtesë për shëndetin e tyre të përgjithshëm.
Në përfundim të testit, bëhet një rekomandim nëse ata duhet të konsultohen me një mjek, të thërrasin urgjencën ose nëse ata janë të paprekur nga virusi.
Ky test u aprovua për të zvogëluar numrin e personave që shkojnë në spitale, për t’u kontrolluar nëse kanë virus apo jo.
Media “France 24” deklaron se testi është bërë nga më shumë se 2 milionë njerëz. Sipas kësaj medie, vetëm 12 % e tyre u thirrën për të kontaktuar shërbimet e urgjencës.
Deri më tani në Francë 674 viktima nga koronavirusi dhe më shumë se 16 mijë persona të prekur.
