Kina duket se ka përparuar me vaksinën e re. Teksa e gjithë bota po mban frymën ndaj koronavirusit, nga Kina kanë ardhur lajme të mira.
Prodhuesi i vaksinave CanSino Biologics, në Tianjin në verilindje të Kinës, tha se po kërkonte vullnetarë për të marrë pjesë në një provë klinike gjashtë mujore, të një trajtimi që kishte zhvilluar së bashku me Akademinë e Shkencave Mjekësore Ushtarake.
Vullnetarët duhet të jenë nga 18 deri në 60 vjeç, pa histori të infeksionit me koronavirus. Mësohet se ajo pritet të hyjë në fazën klinike te njerëzit në mes të prillit.
“Vaksina Ad5-nCoV nuk përmban substanca infektive, është shumë e sigurt dhe e qëndrueshme dhe kërkon vetëm një inokulim”, tha Qendra Hubei për Kontrollin dhe Parandalimin e Sëmundjeve (CDC), në kërkesën e saj për vullnetarë.
Kina ka regjistruar në 24 orët e fundit 13 raste të reja të koronavirusit, nga të cilët vetëm 1 në Wuhan (për ditën e dytë me radhë) dhe 12 raste të importuara.
Numri i rasteve me përsëritje infeksioni është rritur në 155, teksa janë regjistruar edhe 11 viktima.
Totali i infeksioneve në Kinë është 80894. Ende në trajtim janë 8056 pacientë. Totali i vdekjeve është 3237, kurse të shëruarit 69 601. Shkalla e kurimit u rrit në 86%.
